Ég er MA félagsráðgjafi og handleiðari með dioploma gráðu í áfengis- og vímuefnamálum. Tek þátt í samfélagsumræðunni og gef þeim málefnum rödd, sem ég tel mikilvægt að styðja. Er með sérstaka áherslu á græna félagsráðgjöf sem leggur áherslu á verndun náttúrunnar í víðasta skilningi að dýravernd meðtalinni. Félagsráðgjöf snýst þó alltaf um mannréttindi og félagslegt réttlæti og félagsráðgjafi vinnur gegn mannréttindabrotum hvar svo sem þau eiga sér stað. Málsvarahlutverk félagsráðgjafa er í samræmi við siðareglur greinarinnar hér Umhverfisvernd tengist málsvarahlutverki félagsráðgjafa líkt og niðurstöður BA ritgerðar minnar bera með sér.
Áhersla félagsráðgjafar hefur ávallt verið á manneskjuna í samspili við umhverfið. Uppi eru sjónarmið ýmissa fræðimanna um að félagsráðgjöfum beri að tala fyrir félagslegu réttlæti í sinni víðustu mynd að meðtöldu umhverfisréttlæti, þar sem heilsusamlegt umhverfi er hluti af mannréttindum og mannlegri reisn. Ójafn aðgangur að auðlindum í samfélögum skapar ójöfnuð og fátækt í stað sjálfbærni sem hugar að samspili umhverfis, efnahags, samfélags og velferðar. Félagsleg sjálfbærni felur í sér að veita fátæku fólki og öðrum jaðarhópum aðgang að auðlindum líkt og hefð er fyrir í félagsráðgjöf. Hlutverk félagsráðgjafa samkvæmt grænni félagsráðgjöf eru nátengd hefðbundinni samfélagsvinnu og miða að því að auka velferð og lífsgæði einstaklinga, hópa og samfélaga. Í því sambandi aðhyllist undirrituð húsnæði fyrst hugmyndafræðina og skaðaminnkandi nálgun í áfengis og vímuefnamálum.
Með kveðju
Berglind K. Þórsteinsdóttir